Humanissimis doctissimisque viris, dominis Cornelio Gandensi et Georgio Cassandro, amicis suis amplissimis. Coeln.

Salutem. Laborem iam diu manibus meis agitatum, humanissimi viri, iam tandem utcumque absolvi. Dico utcumque, quia conatus eius non est finis, id quod testantur monumenta, quae subinde ad me mittuntur. Nam misit princeps Palatinus Iohannes sui oppidi iconem, miserunt Pomerani quoque varias picturas et descriptiones, miserunt Nordlingenses descriptionem suae Rhetiae, Argentinenses parant quoque suam urbem et Badenses inferiores cupiunt celebrare etiam locum suum. Soli inferiores Germani huc nihil conferunt, qui tamen habitant civitates splendidissimas. Audio apud vos haerere picturam urbis Gandavensis, quam cuperem quoque libro insertam, sed compellandus est senatus, ut aliquid subsidii pecuniarii quoque mittat, sicut reliquae fere omnes Germaniae urbes fecerunt, alioquin quis ferret tantos sumptus. Hoc scio a nobis insumptos 450 florenos in solis figuris sculpendis, sed ut iam scripsi, quidam principes, episcopi et civitates has expensas nonnihil levaverunt. Extraneae civitates nostris sumptibus curantur, quales sunt Lutetia, Roma, Florentia, Cairum (quod iam sculpitur), Constantinopolis, Venetiae, Belgradum, Argiera, Jerosolyma etc. Sollicitavi aliquando litteris meis Aquenses, Traiectenses et Leodienses, sed nihil potui obtinere. Liber evulgatus fortassis deinceps plures incitabit, ut sua sponte huc suas conferant operas. Verum satis de illis. Nunc ad vos redeo.

Condoleo vobis, optimi viii, quod in hunc usque diem adhuc extorres extra patriam agitis, at interim laudo vestram in suscepta verae religionis cognitione constantiam, quod nec patriae dulcis amor vos avellere potest a gustato patriae caelestis amore. Ille qui vobis inspiravit hanc sanctam cogitationem, conservet vos usque in finem.

Nos hic vivimus adhuc more nostro multis terroribus iam per biennium lacessiti. Habeo vobis, optimi viri, ingentes gratias pro libellis quos iam in biennio ad me misistis, quorum prior historia scilicet Flandriae non parum mihi profuit, cum hinc mihi licuerit texere totam genealogiam comitum Flandriae. Alterum vero de triumpho, quo exceptus est rex Philippus, obiter legi aliisque legendum tradidi. Videbimus, quid nobis paritura sint comitia Augustana iam in Iunio futura. Faxit Dominus, ut illius solius gloria quaeratur. Vos interim bene valete.

Basileae, quarta Maii anno 1550.  Sebast. Munsterus